Dai, per piazér tamponéme, nélà – Di Cornelio Galas

Come cambia el mondo, el modo de parlar, de capir bisi per fave.
Se sol qualche més fa qualchedum l'avés dìt «No i m'ha gnancora tamponà, diàolpòrco, e sì che ghe l'ho domandà pù volte...», minimo i avrìa ciamà quei de la neuro.
Disèndoghe a quei del manicomi che gh'era qualchedum che stravaséva, che 'l voléva che i ghe nés endòs ala so machina. Forsi per ciapar i soldi de l'asicurazióm.

Adés enveze, per farse tamponar gh'è adiritura quei disposti a pagar.
Perché così almém se sa se te gài endòs sta rogna del coronavirus.
El sindaco de Arco el gà domandà ala Provincia de tamponar tuti quanti nel so comum, vist che tra case de riposo, de cura e ospedài propri a Arco gh'è stà pu casini che da altre bande.
I gà rispost: «Per entànt meio de no, vedrém pù envanti, magari coi esami del sangue.»
 
El fatto l'è, me par de capir, che de tamponi (come zà sucès co le mascherine e coi guanti) no l'è che al moment ghen sia propri così tanti. E po' no l'è gnancóra dita che fat el tampóm te sei, come dir, en de na bót de fer.
Così come quei che i dìs guaridi no l'è dita che i riciàpa sta rogna.
Diséntela tuta: no se sa gnancóra tut de sto covid disnòve.
E se se lèze i giornài troveré de zert, come se dìs, la verità ma su 'n car a tré ròde. Che no se sa fim quando el starà en pè. O dove el finirà derént per tera.
 
Um che te dìs che col calt el virus el narà piam piam via. L'alter che dis enveze che no l'è vera gnent.
Um che te dis che sul fer e sula plastica el virus el pòl restar anca quatro zinque ore. L'alter che dis el contrari.
Per no parlar de quei che dis che el coronavirus el pòl restar per aria e viazàr anca olter el metro.
E quei che dis che se pòl far el bagno sì, ma meio nele piscine che nel lach o nel mar.
Me sa che le verità (non tute, basterìa almen qualcheduna) le saverém forsi tra n'am.
Così come saverém come l'è partìa sta pandemia. E se i vacini che ades i è drio ancora a studiar i basterà a farne star almem senza mascherine e guanti.
 
De zèrt adès che se parla de fase dói, quela dove i dovrìa slongarne el guinzài e farne piam piam nar for de casa senza spiegar percome e perché, disévo, adès che se parla de «nove libertà» rispèt ai domiciliari, se spera che ghe sia men risci. Perché se no l'è en dàmela-tòmela.
Dove però magari ne trovém col cul per tèra de nof, se non pèzo.
Sèmper che entant no ne abituénte a farne portar da magnar a casa. A star tut el dì davanti ala televisióm o al compiuter.
E a saludar da lontam amizi e parenti. Magari perché no ne vèi pù naturale darse la mam o abrazàrse come prima.
Sperénte de no...