Seràr su tut o avèrzer a metà? – Di Cornelio Galas

Ancòi e domàm – el savré – no se pòl nar nei zimitèri per la festa dei santi e 'l ricordo dei morti.
Tuta colpa sèmper de quela rogna del virus che da stimàne zamài l'è tornà a far vegnìr i sgrisoi. Semper de pù quei che l'ha ciapà, semper de pù anca quei che finìs a l'ospedal per no parlar de quei che nei zimitèri i gh'è finidi prima del temp e senza tanta zent ai so funerài.
 
No se pòl portar i grisantèmi ancòi e domàm? Perché ghe sarìa massa zènt tuta tacàda come tacàe l'è le tombe?
E alora da vèndro a sàbo... tuti nei zimitèri. Per tràrse envànti.
E tuti enmuciài perdepù en quéle poche ore libere da mistéri, impegni.
E tanti poch dopo mezdì, pensando che nesùni i va lì a l'ora de magnàr.
E alora vèi fòra che i zimitèri anca ieri i èra pieni... forse de pù de quel che sarìa stà ancoi o domàm.
 
L'è 'n po' l'istéssa roba che suzéde co la storia de seràr le boteghe de domìnica.
El sabo se và denter per crompàr anca quel che de solit la doménega no se magna.
Perché oscia, meti che restém senza pàm... E difàti ieri el pàm (e miga sol quel) l'è finì zà la matina.
 
No parlénte po' de quel che suzéde nel giro de pochi chilometri. Da Trent a Bolzàm.
A Trènt ristoranti avèrti fim ale dése de séra. De là tut serà quel che se pòl. O avèrt a metà, no del tut.
L'è come se sto coronavirus el timbréssa el cartelìm per nar a far casìm.
El scominzia ale séi de dopodisnàr e 'l vèi de volta (anca perché laoràr de nòt el stràca de pù) la matina ale zinque o ale séi.
Dipende dai posti dove el và a guadagnàrse… el pàm che altri la doménega no i pòl comprar.
 
Adès, capìntene, no l'è el caso, soratut se pensém a quei che stà mal, de butàr en vàca tut quel che se sta zercando de fàr per vegnir fòra da sto disastro.
Però, diséntene la verità, dele volte pàr che sia pèzo el tacóm del sbrégo.
Forsi i ha molà i bòi dala stàla, st'istà, prima del temp. Pòl darse.
Forsi pensévem tuti che lavandose le mam, metendo la mascherina e saludarse coi gòmbeti sarìa bastà per no ciapàr su sta dòja.
 
Pò bastéva vardar la televisióm: i ha tacà via de nof a zugar al balom, a palacanestro, a nar co le bici...
Pecà che anca Cristiano Ronaldo, (con tuti i mèdizi che pòl pagarse um come lù che se 'l perde mili euro no 'l se tòl gnanca la briga de piegar la schéna per tòrli su da tera) l'àbia becà el virus.
E che forsi per quel l'ha sbarà anca tante monae.
Pecà che anca zent che parla denter la televisiom come el Gièrri Scotti, la Marcuzzi, el Conti e perfim el Cairo paróm del coriere dela sera (e de tant alter) è vegnù fòra che i ha ciapà sta malatia.

Ma adès se riscia de no capir pù gnent. Dala sera ala matina i sèita a far nòve lègi. Quel che se podéva far algéri ancòi l'è vietà. E quel che se poderà far la stimàna che vei, en quela dopo sarà en pecà mortal.
En tut sto casìm a 'n zerto punto me som dìt: dài oscia che me fàgo el tampóm. Almém so de che mort mòro no?
El me dotor el m'avéva difàti dit che fìm che no te gài féver sora i trentasette e mèz, tòss, sgrisoi no gh'è da preocuparse. E no 'l me podéva de zert far far el tampòm.
Però, oscia, gh'è anca quei, come se ciàmei, asintomatici no? Quei che no par gavérghe gnent e envéze quando i ghe fa el tampóm vèi fòra che i è malài.
 
Me sòm dit: e se mi gò el coronavirus senza savérlo? Alora gò telefonà, senza savér né lezer e scriver, a na clinica privata.
Per farme far sti esami. I m'ha dit: gh'è quel rapido, te sai tut en poche ore e 'l costa poch.
«Ma – gò domandà – èlo en test serio?»
«Sì, a l'otàntazinque per zent» – i m'ha rispost.
«E per esser pù sicuri?»
«Gh'è quel molecolare. Risposta en 48 ore.»
«Quant cóstel?»
«82 euro.»
Oscia, gò dit a la spósa, e se néssem a magnar el pés fòra? Spendém de zert la metà, passém en par de ore senza vardar le brute robe che i dìs ala televisìom.
E ne vànza anca i soldi per portarne a casa (prima dele sèi de sera) anca la piza nel cartóm...